blog category

POLISI MISRI WAUA WANMAGAMBO SITA

Maafisa wa polisi nchini Misri jana Jumapili wamewaua wanamgambo sita wanaoshukiwa kuhusika katika jaribio la mauaji lililoshindwa lililokuwa likimlenga afisa mkuu wa usalama siku moja kabla katika mji wa pwani wa Alexandria nchini humo.

Wizara ya mambo ya ndani ya Misri katika taarifa yake imesema imebaini mtandao wa kigaidi katika nyumba moja ya makazi kwenye mkoa wa Beheira ulioko jirani na Alexandria ambako wanamgambo sita waliuawa wakati wa tukio la kufyatuliana risasi.

Hakukua na taarifa za mara moja za watu waliohusika na shambulizi hilo la bomu katika gari ambalo shirika la habari la serikali linalihusisha kufanywa na kundi la udugu wa kiisilamu lililopigwa marufuku la Muslim Brotherhood.

ISRAEL YATHIBITISHA KUSHAMBULIA KITUO CHA NYUKLIA CHA SYRIA

Israel imethibitisha kwa mara ya kwanza kwamba ilishambulia kituo kinachoshukiwa kuwa ni cha kinyuklia nchini Syria mwaka 2007, ikisema leo kwamba shambulio hilo liliondoa kitisho kikubwa kwa Israel na eneo lote kwa jumla na lilikuwa ni ujumbe wa wengine.

Taarifa hizo za kwanza kukiri kwa Israel kwamba ndege zake za kivita chapa F-16 na F-5 zilishambulia Septemba 6, 2007, jengo maalumu lililojengwa katika eneo la Al-Kubar karibu na Deir al-Zor zilitolewa baada ya udhibiti wa kijeshi kuondoa amri ya zaidi ya miaka 10 ambayo iliwazuwia maafisa wa Israel kulijadili suala hilo.

Shambulio hilo liliripotiwa kwa kiasi kikubwa nje ya nchi hiyo, na maafisa wa Marekani walilijadili.

Israel hata hivyo ilikaa kimya ili kuepusha kuchochea ulipizaji kisasi kutoka Syria na uwezekano wa vita vya kikanda.

MAKAMU WA RAIS WA JIMBO LA CATALONIA ASHUTUMU KUKAMATWA KWA PUIGDEMONT

Makamu wa rais wa bunge la Catalonia nchini Uhispania amelaani kutiwa mbaroni kwa aliyekuwa kiongozi wa jimbo hilo aliyeko uhamishoni Carles Puigdemont.

Polisi wa Ujerumani walimkamata Puigdemont baada ya kuvuka mpaka wa Denmark Jumapili hatua iliyoibua maandamano katika jimbo la Catalonia.

Makamu wa rais wa jimbo la Catalonia pia ameshutumu mahakama ya Uhispania kwa kumshikilia mgombea wa nafasi ya urais wa jimbo la Catalonia Jordi Turull wakati bunge lilipojaribu kumchagua kushika wadhifa huo.

Viongozi wengine tisa wa jimbo la Catalonia wanaounga mkono kujitenga wako gerezani na wengine watano wako uhamishoni.

TRUMP ATARAJIWA KUTANGAZA VIKWAZO DHIDI YA CHINA BAADA YA UCHUNGUZI

Utawala wa rais Trump unapanga kutangaza vikwazo dhidi ya China leo Alhamisi baada ya kubaini kwamba taifa hilo linashinikiza wizi na uhamisho wa ubunifu kutoka biashara za Marekani.

Ikulu ya whitehouse imesema kuwa hatua hiyo inajiri baada ya miaka kadhaa ya mazungumzo yalioshindwa kupata suluhu kuhusu wala hilo.

Mpango huo umezua hofu kuhusu vita vya kibiashara.

Dura za habari nchini humo zinasema kuwa, Marekani itaiwekea ushuru wa kati ya dola bilioni 30 na 60 kwa mwaka pamoja na masharti ambayo yatazuia uwekezaji .

Vilevile huenda Marekani ikawasilisha malalamishi yake kwa shirika la biashara duniani WTO, kulingana na maafisa wa biashara.

Mpatanishi mkuu wa biashara nchini Marekani Robert Lighthizer ameambia wabunge wa Congress siku ya Jumatano kwamba Marekani inafaa kuiwekea China shinikizo kali na shinikizo ya chini watumiaji wa Marekani.

GRACE MUGABE ACHUNGUZWA KWA KASHFA YA KUSAFIRISHA PEMBE ZA NDOVU

Maafisa wa polisi nchini Zimbabwe wamethibitisha kwamba wanafanya uchunguzi baada ya kupokea ripoti kwamba mkewe rais wa zamani wa Zimbabwe Robert Mugabe amekuwa akisafirisha pembe za ndovu.

Vyombo vya habari vya serikali vinasema kuwa mamlaka ya wanyama pori nchini humo ilifichua kwamba Grace Mugabe kinyume na sheria alisafirisha kiwango kikubwa cha pembe za ndovu hadi China, Marekani na UAE .

Mpiga picha mmoja wa wanyama pori Adrian Steiirn alisema kuwa alipata thibitisho la kashfa ya usafirishaji pembe hizo zinazohusishwa na bi Grace Mugabe baada ya kufanya kazi kama jasusi nchini Zimbabwe.

Inadaiwa kwamba Bi Mugabe alifanikiwa kusafirisha pembe hizo kupitia uwanja wa ndege wa taifa hilo bila kufanyiwa ukaguzi wowote.

MMILIKI WA FACEBOOK APIGA GOTI KWA KASHFA YA ANALYTICA

Mwanzilishi wa mtandao wa Facebook Mark Zuckerberg kwa mara ya kwanza tangu kuzuka kwa kashfa ya Cambridge Analytica,ameibuka na kudai kwamba wamefanya makosa.

Analytica inatuhumiwa kuingilia data za watumiaji million 50 wa mtandao wa Facebook.

Katika ujumbe wake kupitia ukurasa wake wa Facebook Zuckerberg amesema kitendo hicho kimewavunjia uaminifu.

Hivyo kutokana na hali hiyo ameahidi kufanyika mabadiliko kadhaa ili kutoingiliwa na kuibwa kwa taarifa za watumiaji wake.

Katika kufuatilia matatizo ya sasa na ya zamani amesema atafanya mambo yafuatayo.

Kuchunguza mitandao yote ambayo inashirikiana na uga wa Facebook kabla ya kufanyiwa mabadiliko ya mwaka 2014 ya namna ya kuweza kupata taarifa ya watumiaji.

Kufanyia uchunguzi kazi za program za kimitandao zinazotiliwa shaka.

Kupiga marufuku mwanzilishi wa program yoyote ambayo inagoma ama haitoi ushirikiano katika uchunguzi pamoja na hatua nyingine ambazo wanaona zita pafanya Facebook kuwa mahala salama.

Na pia amesema hakuna maelezo yoyote kwa wizi wa taarifa zake uliofanyika mwaka 2014,hapo ilikuwa ni wakati muafaka kuchukua hatua sitahiki.

WATU 53 WAFARIKI KATIKA MKASA WA MOTO

Watu 53 wamethibitishwa kufariki baada ya moto kuzuka katika jumba moja kubwa la kibiashara katika mji maarufu kwa uchimbaji wa mkaa wa mawe wa Kemerovo, eneo la Siberia nchini urusi.

Watu zaidi ya 64 hawajulikani walipo, wakiwemo watoto 41.

Baadhi ya maeneo ya jumba hilo kubwa yanadaiwa kuwa kwenye hatari ya kuporomoka.

Moto huo ulianza katika ghorofa ya juu katika jumba Winter Cherry.

Inadaiwa wengi wa waliofariki walikuwa kwenye kumbi za sinema.

Video zilizopakiwa mitandao ya kijamii zinawaonesha watu wakiruka nje kupitia madirisha kujaribu kujinusuru kutoka kwa moto huo uliozuka Jumapili.

Wazima moto zaidi ya 660 wametumwa kusaidia juhudi za uokoaji.

Chanzo cha moto huo hakijabainika lakini maafisa wameanzisha uchunguzi.

Kemerovo, ni eneo maarufu sana kwa uchimbaji wa mkaa wa mawe.

Ni mji unaopatikana takriban kilomita 3,600 mashariki mwa mji mkuu Moscow.

Kansela wa Austria Sebastian Kurz ametuma salamu zake za rambirambi kwa jamaa na marafiki wa waathiriwa, sawa na Waziri wa mambo ya nje wa Latvia Edgars Rinkēvičs.

MZOZO WA WAHAMIAJI UMEIGAWA UJERUMANI: MERKEL

Kansela wa Ujerumani Angela Merkel amesema kwamba mzozo wa wahamiaji barani Ulaya umesababisha mgawanyiko mkubwa nchini humo.

Akihutubia bunge mjini Berlin Merkel amesema mjadala kuhusu suala hilo umeligawa taifa hilo.

Hali ya sintofahamu kuhusiana na suala la wahamiaji imehusika zaidi na matokeo hafifu ya kihistoria katika uchaguzi wa mwezi Septemba kwa chama cha Merkel cha Christian Democratic Union CDU pamoja na mshirika wake katika serikali ya mseto chama cha siasa za wastani za mrengo wa kushoto cha Social Democratic SPD.

Pia kansela Merkel amekosoa operesheni za kijeshi za Uturuki katika jimbo la Wakurdi nchini Syria la Afrin.

Amesema licha ya uhalali wote wa maslahi ya kiusalama ya Uturuki, haikubaliki kwa kile kinachotokea katika jimbo la Afrin ambako maelfu kwa mamia ya raia wanafuatiliwa, wanakufa na wanalazimika kukimbia.

Amesisitiza kwamba anashutumu hatua hiyo kwa nguvu zote.

Page 1 of 104