blog category

TUTATEKELEZA AHADI ZOTE ZILIZOTOLEWA NA RAIS-MAJALIWA

WAZIRI MKUU Kassim Majaliwa amewahakikishia wananchi kwamba ahadi zote zilizotolewa na Rais Dkt. John Magufuli katika maeneo mbalimbali nchini zitatekelezwa, hivyo amewaomba waendelee kuiamini na kushirikiana na Serikali yao.

Ametoa kauli wakati akizungumza na wananchi wa wilaya ya Songwe kwenye mkutano wa hadhara uliofanyika katika uwanja wa Mkuwajuni.Waziri Mkuu yuko Mkoani Songwe kwa ziara ya kikazi.

Waziri Mkuu amesema kwamba Serikali ya awamu ya Tano ipo makini na imejipanga vizuri katika kutekeleza ahadi mbalimbali zilizotolewa na Rais Dkt. Magufuli kama Ilani ya uchaguzi wa Chama Cha Mapinduzi (CCM) ya mwaka 2015-2020 inavyoelekeza.

Waziri Mkuu amesema hayo baada ya mbunge wa jimbo la Songwe, Mheshimiwa Philipo Mulugo kumuomba awasaidie kumkumbusha Rais Dkt. Magufuli kuhusu ahadi yake ya ujenzi wa barabara ya lami yenye urefu wa kilomita nne wilayani Songwe.

“Ahadi zote zilizotolewa na Mheshimiwa Rais Dkt. Magufuli tutazitekeleza, ikiwemo na hii aliyoikumbusha Mheshimiwa Mulugo ya ujenzi wa kilomita nne za barabara ya lami. Tunawaomba wananchi muendelee kuwa na imani na Serikali yenu.”

Pia Waziri Mkuu alipiga marufuku wananchi kufanya shughuli za kibinadamu ndani ya mita 60 kutoka katika vyanzo vya maji na kuwataka washirikiane katika utunzaji wa mazingira ili kuliepusha Taifa kugeuka jangwa.

Alisema ni vema wananchi wakazingatia Sheria ya Mazingira inayozuia kufanya shughuli za kibinadamu zikiwemo za kilimo kwenye maeneo yote ya vyanzo vya maji ndani ya mita 60. Aliwaagiza Wakuu wa Idara kusimamia jambo hilo.

Waziri Mkuu alisema kwa sasa maeneo mengi yanakabiliwa na changamoto ya upatikanaji wa maji jambo ambalo linachangiwa na vitendo vya uharibifu wa mazingira vinavyofanywa na baadhi ya wananchi, hivyo aliwataka wabadilike.

Hata hivyo, amesema Serikali inaendelea na utekelezaji wa Kampeni ya Rais Dkt. Magufuli ya kumtua mama ndoo kichwani, ambapo itahakikisha kwamba wananchi wote wanapata huduma ya maji katika umbali usiozidi mita 400 kutoka kwenye makazi yao.

Pia Waziri Mkuu amewaeleza wananchi hao kwamba, Serikali bado inaendelea kutafuta vyanzo mbalimbali vya maji na kuhakikisha vinabainishwa na kufanyiwa tathmini ili viweze kuendelezwa na kuongeza upatikanaji wa maji nchini.

Naye Mkuu wa Mkoa wa Songwe, Bi. Chiku Gallawa akizungumzia hali ya upatikanaji wa maji katika mkoa huo amesema watu wanaopata huduma za maji safi na salama katika maeneo ya mijini ni asilimia 42 na vijijini ni asilimia 41.6.

Amesema katika bajeti ya 2017/2018 halmashauri za mkoa huo zimetengewa jumla ya sh bilioni 7.5 kwa ajili ya utekelezaji wa miradi mbalimbali ya maji ikiwa ni pamoja na ujenzi wa matanki ya kuvunia maji ya mvua katika majengo yaTaasisi za Umma.

Pia mkoa huo unatekeleza mpango kazi wa usambazaji maji katika maeneo ya mijini na vijijini kwa kupanua mifumo ya usambazaji na kuzijengea uwezo mamlaka za maji na ifikapo Desemba mwaka huu wataongeza idadi ya wananchi wanaopata huduma hiyo kutoka asilimia 45.04 hadi asilimia 55.63.

RAIS MAGUFULI ATOA MSAADA VITANDA NA MAGODORO MKOMAINDO MTWARA

Rais Dk. John Pombe Magufuli ametoa msaada wa vitanda 20,magodoro 20 pamoja na mashuka 50 kwa hospitali ya Mko maindo iliyopo wilaya ya Masasi mkoani Mtwara, ikiwa ni jitihada zake za kuhakikisha wananchi anaowaongoza wanapata huduma bora za afya.

Akikabidhi msaada huo wenye thamani ya zaidi ya shilingi milioni 11 kwa niaba ya Rais Magufuli,mkuu wa mkoa wa Mtwara Halima Dendego amesema kuwa Rais Magufuli ametoa msaada huo wa vitanda,magodoro pamoja na mashuka ili wananchi wake wapate huduma bora za afya jitihada ambazo anazifanya nchi nzima.

Mganga mkuu wa Halmashauri ya mji wa Masasi Dk. Mussa Rashid ambae amepokea msaada huo amesema kuwa msaada huo umesaidi kupunguza tatizo la ukosefu wa vitanda vya kulaza wagonjwa katika hospitali ya mkomaindo.

Aidha makabidhiano hayo yameenda sambamba na makabidhiano ya kadi za uanachama wa CHF kwa wazee wa kata ya Temeke ,makabidhiano ambayo yamefanyika katika ujenzi wa zahanati ya kata ya temeke inayokusudia kuondoa adha ya wakazi zaidi ya elfu 11 wanaotembea umbali mrefu kufuata huduma za afya.

WARUNDI WALIOPO NCHINI WATAKIWA KURUDI KWAO

Rais wa Jamhuri ya Burundi Mhe. Pierre Nkurunziza amefanya ziara ya Rasmi ya Kiserikali ya siku moja hapa nchini kwa mwaliko wa Rais wa Jamhuri ya Muungano wa Tanzania Mhe. Dkt. John Pombe Magufuli.

Ziara hiyo imefanyika katika Wilaya ya Ngara Mkoani Kagera ambapo Mhe. Rais Nkurunziza amepokelewa rasmi kwa kupigiwa mizinga 21 na kukagua gwaride rasmi lililoandaliwa na Jeshi la Ulinzi la Wananchi wa Tanzania (JWTZ) kwa heshima yake katika eneo la Lemela na baadaye mazungumzo rasmi na dhifa ya kitaifa iliyofanyika Mjini Ngara.

Baadaye viongozi hao wamezungumza na wananchi katika mkutano wa hadhara uliofanyika katika uwanja wa Posta ya zamani Mjini Ngara.

Akizungumza katika mkutano huo, Mhe. Rais Magufuli aliyeongozana na Mkewe Mama Janeth Magufuli amemshukuru Mhe. Rais Nkurunziza kwa kukubali mwaliko wake na amemhakikishia kuwa Serikali yake ya Awamu ya Tano itaendeleza na kuimarisha zaidi uhusiano na ushirikiano wa kihistoria na kindugu na nchi ya Burundi hususani katika kukuza biashara na uwekezaji.

“Tanzania ni ndugu zako na Watanzania ni ndugu wa watu wa Burundi, umekuja kwa mazungumzo ya kiuchumi, tumezungumza mambo mengi ya kuimarisha biashara kati Tanzania na Burundi, katika takwimu za mwaka 2016 biashara kati ya Tanzania na Burundi ilikuwa na thamani ya Shilingi Bilioni 116.5, kiwango hiki ni kidogo kwa nchi ya Burudni ambayo ina watu zaidi ya Milioni 10 na Tanzania ambayo ina watu zaidi ya Milioni 52” amesema Mhe. Rais Magufuli.

Halikadhalika Mhe. Rais Magufuli amesema Serikali ya Tanzania inaendelea na juhudi zake za kujenga reli ya kati kwa kiwango cha kisasa (Standard Gauge) ambayo itaunganisha bandari ya Dar es Salaam na nchi za Burundi na Rwanda na hivyo amemhakikishia Mhe. Rais Nkurunziza kuwa reli hiyo itakuwa kichocheo kikubwa cha uchumi wa Tanzania na nchi hizo.

Aidha, Mhe. Rais Magufuli amempongeza Mhe. Rais Nkurunziza kwa juhudi zake za kusimamia amani nchini mwake na ametoa wito kwa wakimbizi wa Burundi ambao bado wapo nchini Tanzania kuitikia wito wa Rais wao aliyewataka warudi nchini Burundi ili wakaendelea kujenga Taifa lao kwa kuwa hali ni shwari.

Pia Mhe. Rais Magufuli amemuagiza Waziri wa Mambo ya Ndani ya Nchi Mhe. Mwigulu Lameck Nchemba kusitisha utoaji wa uraia kwa wakimbizi hao ili utaratibu huo usitimiwe kama kigezo cha watu kuzikimbia nchi zao.

Kwa upande wake Mhe. Rais Nkurunziza amemshukuru Mhe. Rais Magufuli kwa mwaliko wake na amesema Tanzania na Burundi ni ndugu na majirani ambao uhusiano na ushirikiano wake ulianza hata kabla ya uhuru.

Mhe. Rais Nkurunziza ametoa wito kwa wafanyabiashara wa Tanzania kwenda kufanya biashara Burundi na wafanyabisahara wa Burundi kuja Tanzania bila wasiwasi na amebainisha kuwa hali ya Burundi ni shwari kwani hata wakimbizi waliokimbilia Tanzania miaka miwili iliyopita wameanza kurejea nchi Burundi kwa hiari yao na wanaendelea na shughuli zao kama kawaida.

“Tunataka kuwajulisha wenzetu Watanzania na Warundi wenzetu ambao walikimbilia Tanzania, Burundi ya leo ni nchi yenye amani, tunawaalika Warundi wenzetu, kaka zetu na dada zetu ambao walikimbilia hapa Tanzania, warudi nchi kwao tujenge nchi yetu iwe na amani ya kudumu.

Tunapata faraja kwamba Warundi wenzetu ambao walikimbilia Tanzania miaka miwili iliyopita ambao wanafikia idadi ya 150,000 wameanza kurudi Burundi bila ya kupitia Shirika la Wakimbizi Duniani (UNHCR), kwa hiyo tunasema wote rudini nyumbani” amesema Mhe. Rais Nkurunziza.

Katika ziara hii Mhe. Rais Magufuli ameongozana na Mawaziri watano na Mhe. Rais Nkurunziza ameongozana na Mawaziri watano ambao pamoja na viongozi wengine wa taasisi na vyombo vya ulinzi na usalama wameshiriki mazungumzo rasmi.

Mhe. Rais Nkurunziza amemaliza ziara yake rasmi ya kiserikali ya siku moja hapa nchini na amerejea nchini Burundi.

Kesho tarehe 21 Julai, 2017 Mhe. Rais Magufuli ataendelea na ziara yake Mkoani Kigoma ambapo ataweka jiwa la msingi la ujenzi wa barabara ya Nyakanazi – Kibondo na barabara ya Kidahwe – Kasulu pamoja na kuzungumza na wananchi.

SERIKALI YAMUONYA TUNDU LISSU AACHE PROPAGANDA

Serikali imemuonya Mbunge wa Singida Mashariki kwa tiketi ya Chama cha Demokrasia na Maendeleo (CHADEMA), Tundu Lissu kutekeleza wajibu wake kwa kusimamia weledi akiwa kama Wakili wa Mahakama Kuu badala ya kufanya Propaganda kwa kutumia lugha ya kejeli, kuudhi na uchochezi kuituhumu Serikali kuwa inabana demokrasia nchini.

Hayo yameelezwa jana, Jijini Dar es Salaam na Mkurugenzi wa Idara ya Habari (MAELEZO) na Msemaji Mkuu wa Serikali Dkt. Hassan Abbasi katika taarifa kwa Umma aliyoitoa juu ya ufafanuzi kuhusu propaganda na upotoshaji wa Mbunge huyo.

Taarifa hiyo imesema kuwa madai kwamba Serikali inakandamiza demokrasia ni propaganda tu za kisiasa, kutokana na Lissu kuonekana kuchanganya kati ya haki katika demokrasia ambazo hata yeye amezitumia kuongea na wanahabari bila tashtiti kwa upande mmoja na misingi ya wajibu kwa upande mwingine ambayo kila mmoja, iwe Tanzania au kwingineko duniani, anayo na pale anapoikiuka hatua huchukuliwa.

Dkt. Abbasi amesema kuwa tofauti na upotoshaji wa Lissu, Tanzania ikiwa nchi kiongozi Afrika na duniani katika kuenzi demokrasia na kupigania haki, si tu inaendelea kuenzi misingi hiyo bali pia imechukua hatua za wazi kuhakikisha kuwa misingi hiyo inalindwa na pale mtu na hata taasisi zinapokiuka basi mkondo wa sheria, jambo muhimu katika utawala bora, huchukua nafasi yake.

Vile vile ameeleza kuwa, Tanzania ni ikiwa mwanachama wa Umoja wa Mataifa (UN), hivyo imeridhia Mkataba wa Kimataifa wa Haki za Kiraia na Kisiasa wa mwaka 1966 na huwasilisha taarifa zake za utekelezaji wa demokrasia na haki za binadamu katika Kamisheni ya UN ya Haki za Binadamu.

Pia ni mwanachama kiongozi wa Umoja wa Afrika (AU) ambapo imeridhia Mkataba wa Afrika wa Haki za Binadamu na Watu na ni miongoni mwa nchi za kwanza kabisa Afrika kukubali kushtakiwa na wananchi wake kwa kuridhia itifaki ya Mahakama ya Afrika ya Haki za Binadamu na pia kukubali kufanyiwa ukaguzi katika utawala bora kupitia Mpango wa Afrika Kujitathmini Kiutawala Bora (APRM).

“Ni kwa sababu hizi basi tunamuasa Ndugu Lissu na wananchi kwa ujumla kujiepusha na propaganda, kejeli na uzushi usio na msingi dhidi ya Serikali au taasisi zake na pale ambapo wanadhani kuna haki zimekiukwa badala ya kuvunja sheria ni vyema kutafuta haki kupitia mkondo wa kisheria ambao tumeuainisha hapo juu,” imefafanua taarifa hiyo.

Dkt. Abbasi amesema kuwa Serikali itaendelea kuenzi na kuilinda misingi ya demokrasia, uhuru wa watu na kuwapa fursa wananchi kushiriki katika uchumi wa nchi hasa wakati huu wa mageuzi makubwa ya kiutendaji chini ya Rais Dkt. John Pombe Magufuli lakini haitavumilia mtu yeyote au kikundi chochote kitakachojaribu kutumia uhuru wowote vibaya ili tu kukwaza azma hiyo ya Taifa.

WAKULIMA WADOGOWADOGO KUNUFAIKA NA FURSA ZA MASOKO

Mpango mpya unaohamasishwa na wadau wa sekta ya kilimo hatimaye utawapa wakulima wadogo nchini kote fursa ya kupata masoko ya uhakika na endelevu kwa kuepuka madalali wa mazao yao.

Akizungumza na waandishi wa habari kwenye warsha ya siku moja iliyoandaliwa na Farm Africa jijini Dar es Salaam, Mkurugenzi Mkazi wa Tanzania wa Farm Africa, Steve Ball amesema kuwa warsha hiyo imelenga kuwafudisha wakulima namna bora kuingia kwenye mfumo rasmi wa biashara ya nafaka.

Ball amesema kuwa jukwaa hilo la wadau kwenye sekta hiyo linaunganisha biashara nzima ya nafaka kutoka kwenye shamba hadi sokoni na inashirikisha mkusanyiko wa programu zinazoruhusu watumiaji kusimamia hesabu, mazao ya biashara, soko endelevu na kupata mikopo kutoa kwenye taasisi za fedha.

Mshauri wa Sera kutoka Wizara ya Kilimo, Mifugo na Uvuvi, Revelian Ngaiza amesema serikali inatafuta njia bora ya kupunguza gharama za shughuli za kilimo kwa mkulima mdogo kwa kuboresha mfumo wa miundombinu, usafiri na usambazaji.

WATAALAM WA APRM WAMPONGEZA RAIS MAGUFULI

Waatalaam wa Mpango wa Kujitathmini Kiutawala Bora Barani Afrika (APRM) wameelezea kuridhishwa na Serikali ya Rais John Pombe Magufuli katika kusimamia misingi ya Demokrasia na UtawalaBora nchini.

Kauli hiyo imetolewa jana jijini Dar es Salaam na Mkuu wa Kitengo cha Tathmini za Nchi katika Sekretariati ya APRM na Mratibu wa Mchakato wa Tanzania, Dkt. Rachel Mukamunana wakati akiongea na waandishi wa Habari kuhusu uzinduzi wa ripoti ya APRM utakaofanywa na Makamu wa Rais Mheshimiwa Samia Suluhu Hassan.

Dkt. Rachel amesema kuwa serikali ya Tanzania imekuwa ikitoa ushirikiano wa kutosha katika utekelezaji wa masuala yanayohusu utawala bora ikiwemo kutatua kero mbalimbali zikiwemo zile zinazohusu masuala ya muungano.

Kutoka na kujitoa huko kwa serikali, Dkt. Rachel amesema kuwa anatarajia serikali ya Tanzania itaendelea kuzitafutia ufumbuzi changamoto zilizoanishwa katika ripoti hiyo ya mwaka 2012 ambayo inayozinduliwa leo.

Nae Katibu Mtendaji wa APRM Tanzania, Rehema Twalib alieleza kuwa ripoti hiyo imeanisha sifa ambazo Tanzania imekuwa ikisifiwa nazo kuwa ni pamoja na kudumisha amani na umoja, kudumisha Muungano kwa zaidi ya miaka 50, pamoja na uboreshwaji wa utoaji huduma za kijamii ikiwemo elimu, afya, maji, usawa wa kijinsia na Teknolojia na habari na mawasiliano (TEHAMA).

Alibainisha sifa zingine linazotajwa kwa Tanzania kuwa ni kulinda haki binadamu, matumizi ya lugha moja ya kiswahili, na hatua za maendeleo ya kiuchumi nchini.

Katibu huyo alisema kuwa uzinduzi wa ripoti ni utekelezaji wa mojawapo ya matakwa ya kiutaratibu katika mchakato wa APRM, ikiwa ni kiashiria kimojawapo cha utekelezaji rasmi ya yale yaliyoandikwa kwenye ripoti pia kielelezo cha utayari wa Serikali katika kutatua changamoto zinazowakabili wananchi wake.

Rehema alisema kuwa lengo la APRM ni kuzisaidia nchi za Kiafrika, Tanzania ikiwa mwanachama mmoja wapo, kuhakikisha kuwa zinaimarisha utawala bora.

Hii ni kwa kuwashirikisha wananchi wao kubanisha changamoto ili kuzigeuza kuwa fursa za maendeleo na mambo mazuri ya kuendelezwa kwa faida ya nchi yenyewe na hata kuwa mfano wa kuigwa na nchi nyingine.

APRM Tanzania ilipewa dhamana na serikali ya Jamhuri ya Muungano wa Tanzania kusimamia majukumu ya nchi katika kuratibu tathimini ya Utawala bora kwa mujibu wa wa miongozi ya Wakuu wa Nchi za Kiafrika.

POLISI WA OPERESHENI RUFIJI WAUA WAWILI WANAO SADIKIKA KUWA NI WAHALIFU

Askari Polisi waliokwenye operesheni ya kuwasaka wahalifu wanaoendesha mauaji katika wilaya za Mkuranga, Kibiti na Rufiji Mkoani Pwani, wamewaua watu wawili wanaosadikiwa kuwa miongoni mwa wahalifu hao.

Mkuu wa Operesheni hiyo Naibu kamishna wa Polisi Liberatus Sabaas amesema kuwa tukio hilo lilitokea katika eneo la Utende kata ya Ikwiriri wilayani Rufiji, baada ya polisi kuwatilia mashaka watu watano na katika kuwafuatilia, walianza kukimbia huku wakiwashambulia askari kwa risasi, na kwamba watuhumiwa hao walifariki dunia wakati wakiwa njiani kupelekwa hospitali ya Taifa Muhimbili kwa matibabu baada ya kuvuja damu nyingi kufuatia majeraha ya risasi waliyopata mwilini.

Katika tukio hilo Polisi walikamata silaha moja aina ya Rifle 375 ambayo imekatwa kitako na mtutu ikiwa na risasi mbili, na kwamba mtuhumiwa mmoja ametambuliwa kuwa ni Abdallah Ally Ngande Makeo, ambaye amekuwa akitafutwa kwa muda mrefu kutokana na matukio hayo ya uhalifu.

MAAFISA ELIMU WAPEWA CHANGAMOTO YA KUBORESHA MAZINGIRA YA SHULE

Naibu waziri ofisi ya rais Tawala za mikoa na serikali za mitaa – TAMISEMI Seleman Jaffo amewaagiza maafisa Elimu kuboresha mazingira ya shule za msingi na sekondari kwa kuweka mandhari ya kuvutia kwa wanafunzi hususan katika shule zilizoko pembezoni.

Naibu Waziri Jaffo ametoa agizo hilo wilayani kisarawe mkoani Pwani akiwa kwenye ziara ya kukagua miradi mbalimbali inayotekelezwa chini ya ofisi ya Rais ikiwemo ujenzi wa madarasa katika shule ya msingi kwala na sekondari ya maneromango, ambayo inatarajiwa kuchukua wanafunzi wa kidato cha tano baada ya kukamilika kwa ujenzi huo.

Ameshauri shule zote kubadili muonekano kwa kupanga matofali pembeni mwa barabara zilizo katika eneo la shule pamoja na kupanda majani na miti ili kiwe kivutio kwa wanafunzi.Aidha alikagua miradi mbalimbali ya maji wilayani humo.

Akizungumzia hali ya elimu wilayani kisarawe Afisa elimu msingi wilaya hiyo Shomali Bani amesema iko asilimia sitini ya ufaulu licha ya kukabiliwana changamoto ya uhaba wa walimu ukilinganisha na idadi ya wanafunzi.

Page 1 of 146